Meray Pani Mein Mila Aur Zara Sa Pani - Mazahiya Ghazal

Meray Pani Mein Mila Aur Zara Sa Pani,
Meri Adat Hay K Peeta Hoon Main Patla Pani,
 
Allah Allah Safai Say Wo Raghbat Us Ki,
Us Ny Huq’qay Ka Kai Saal Sy Na Badla Pani,
 
Mujh Ko Sugar Bhi Hay Aur Pass-e-Sharee'at B Hay,
Meri Qismat Main Na Meetha Hay Na Karwa Pani,
 
Cha'ay Hi Cha'ay Badan Mein Lahu K Badly,
Dorta Hay Ab Ragon Mein Yehi Ta’ta Pani,
 
Main Nay Ek Falsafi Iss Fikar Mein Dooba Dekha,
Hota Kis Tarah Ka Gila Jo Naa Hota Pani,

Itni Achi B Nahin Itni Samaaji Tanqeed,
Band Ho Jaye Naa Anwar Tera Huq'qa Pani.

- Anwar Masood