Baa-Adab Baa-Naseeb

سیانے کہہ گۓ ہیں کہ "با ادب با نصیب، بے ادب بے نصیب" ... اگر کوئی شخص ہم سے بدتمیزی سے پیش آے تو ہماری کوشش ہوتی ہے کہ اس سے پھر بات نہ ہو یا اگر ہو بھی جاۓ تو مروت سے ہی ہوتی ہے التفات سے نہیں ... یوں بھی کہتے ہیں کہ استاد کا ادب کامیابی کا پہلا زینہ ہے ... کہ بے ادب شاگرد کو رشد و ہدایت اور محبت نصیب نہیں ہوتیں ... بارگاہ مرشد یا بارگاہ رسالت (صلی اللہ علیہ وسلم) سے بھی فیض صرف انھیں ہی ملتا ہے جو ادب کا دامن تھامے رکھتے ہیں ، باقی لوگ بس "رولا" ڈالی رکھتے ہیں ... اقبال ؒ نے اسی مضمون کو کچھ یوں بیان فرمایا:

خموش اے دل! بھری محفل میں چلانا نہیں اچھا ،

ادب  پہلا  قرینہ ہے  محبت  کے  قرینوں  میں !

انس ، نسیان اور انسان

بزرگ فرما رہے تھے کے انسان کا مادہ "انس" اور "نسیان" سے ہے . انس یعنی محبت کرنا اور نسیان یعنی بھول جانا ... مقصود یہ تھا کے خدا سے محبت اور دنیا کو بھولنا مگر معاملہ الٹ ہو گیا اور اس دنیا میں آ کر انسان رب کو بھول گیا اور دنیا کی محبت میں گرفتار ہو گیا ... اگر انسان اپنی سمت درست کر لے اس معاملے، میں تو زندگی کے راز کو پا لے گا . یہی انسان کی معراج ہے ...